Volite vino i obožavate čokoladu, ali šta se dešava kada ih kombinujete? Istraživali smo kako napraviti savršen spoj ova dva vrhunska užitka svih hedonista, pa vam predstavljamo mali vodič, i otkrivamo kako ih upariti na pravi način.
Svilenkasta, baršunasta i meka vina su najbolji prijatelji čokolade.
I vino i čokoladu mogu odlikovati intenzivni, suvi ukusi. Kada spojite tamnu, gorko-slatku čokoladu sa moćnim crvenim vinom visokog sadržaja tanina, to može biti pravi užitak za nepce. Da biste pronašli pravi balans, najbolje je izabrati vina koja su malo mekša i sočnija od čokolade s kojom ih uparujete.
Pronađite savršeno slatke note.
Iako može zvučati čudno, kombinovanje čokolade i vina koje je “slađe” od same čokolade zapravo funkcioniše prilično dobro. A kada kažemo „slatko“ vino, ne mislimo samo na desertna vina. U vinskom svijetu, termin “slatko” se ponekad koristi za označavanje zrelih, voćnih ukusa. Ove karakteristike pružaju lijep balans kakao aromama.
Uskladite slične intenzitete.
Kada ste u nedoumici, uparite čokolade i vina koja imaju sličan stil i težinu. Čokolade slabijeg intenziteta dobro se slažu sa vinima laganijeg tijela, dok čokolade sa intenzivnijim ukusom mogu odlično slagati sa vinom punijeg tijela.
Degustirajte od svijetlih ka tamnim bojama.
Baš kao i sa bilo kojom drugom degustacijom, najbolje je početi sa lakšim čokoladama i vinima, postepeno povećavajući intenzitet aroma kako idete dalje. Počnite sa bijelom čokoladom i svijetlim vinima, a sačuvajte najbogatiju, tamnu čokoladu i crvena vina za kraj.
Razmotrite sve druge sastojke.
Ako čokolada sadrži druge sastojke poput orašastih plodova, voća ili karamele, razmislite kako će se ovi ukusi poigrati sa vinskim notama. Na primjer, čokolada sa sušenim brusnicama može se dobro uklopiti sa crvenim vinom voćnih nijansi.
Dodatni savjeti:
Bijela čokolada se dobro slaže sa rizlingom, Moscato d’Asti bijelim desertnim vinom i slađim rosé vinima. Ova čokolada, se inače pravi od kakao maslaca, šećera i mlijeka, ima slatkast, puterast ukus sa notama meda i slatke pavlake. Slatka bijela i rosé vina i pjenušavi šampanjci sjajan su par bogatim ukusima bijele čokolade.
Mliječna čokolada ide uz vina poput Pinot Noir-a, Merlot- a, Gewurtztraminer- a. Ova vrsta čokolade je obično dosta slađa i kremastija, sa ukusom smeđeg šećera, vanilije i slatke pavlake. Potrebno ju je upariti sa vinom laganog do srednjeg tijela, sa posebnim karakterističnim ukusom zrelog voća.
Tamna čokolada lijepo će se kombinovati sa Zinfandelom, Cabernet Sauvignon- om, Merlot-om. Gorke do poluslatke čokolade koje sadrže 50 do 100% kakaoa odlikuju intenzivni, gorki ukusi i zemljane ili voćne nijanse. Uskladite intenzitet njihovih aroma bez dodavanja viška suvih nota tako što ćete ih upariti sa punim i bogatim ukusima voćnih vina.
Čokolada od lješnika slagaće se najbolje sa crvenim italijanskim Brachetto d’Acqui. U ovom slučaju, orašasti ukus lješnika upotpunjen je aromatičnim, blago slatkim crvenim vinom iz italijanske regije Piemont.
